gazab kiya, tere vaade pe aetbaar kiya
tamaam raat qayamat ka intezaar kiya
hasa hasa ke shab-e-vasl ashkbaar kiya
tasalliya mujhe dede ke beqaraar kiya
ham aise mahv-e-nazaara na the jo hosh ata
magar tumhare tagaaful ne hoshiyaar kiya
fasana-e-shab-e-gam unko ek kahaani thi
kuch aetabaar kiya aur kuch na-aetabaar kiya
ye kisne jalwa hamare sar-e-mazaar kiya
ki dil se shor utha, haaye beqaraar kiya
tadap phir aye dil-e-nadan, ki gair kehte hain
aakhir kuch na bani, sabr ikhtiyaar kiya
bhula-bhula ke jataya hai unko raaz-e-nihaa
chipa-chipa ke mohabbat ko aashkaar kiya
tumhe to vada-e-deedar ham se karna tha
ye kya kiya ke jahaan ko umeedwar kiya
ye dil ko taab kaha hai ke ho maalandesh
unhone vada kiya ham ne aetabaar kiya
na pooch dil ki haqeeqat magar ye kehte hain
wo beqaraar rahe jisne beqaraar kiya
kuch aage daawar-e-mahshar se hai umeed mujhe
kuch aap ne mere kehne ka aetabaar kiya
shab-e-vasl = night of meeting
ashkbaar = full of tears
mahv-e-nazaara = the state of being immersed in a beautiful scenery
tagaaful = neglect, ignore
fasana-e-shab-e-gam = story of the night of sorrow
raaz-e-nihaa = secret of something that is hidden
aashkaar = to reveal
vada-e-deedar = promise of meeting
taab = power, endurance
maalandesh = consequences, result of any action
daawar-e-mahshar = The Judge Presiding On The Day Of Judgement, i.e, God
Subscribe to:
Post Comments (Atom)
No comments:
Post a Comment